Почитувани,

Традиционално, пред почетокот на претставите ќе бидат прочитани меѓународната и македонската порака посветени на актуелниот театарски миг. Меѓународната порака за Светскиот ден на театарот – 27 март е Карлос Селдран – режисер, драмски писател, театарски едукатор и професор од Куба, а македонската порака за 2019 година е на Југослав Петровски – драмски писател.

Македонскиот народен театар ќе го даде својот придонес кон одбележувањето на 27 март – Светски ден на театарот – со изведбата на претставата „Животот е прекрасен“ од Николај Ердман во режија на Александар Морфов.

Во Драмски театар Скопје 20:00ч “Луди за љубов “Автор:  Сем  Шепард Режија:  Деан Дамјановски Музика:  Миодраг Неќак
Автор на композиција: Јана Стојановска МАЛА СЦЕНА

Театарот “ Војдан Чернодрински “ Прилеп на матичната сцена ќе ја одигра претставата “ Пиреј “ во чест на светскиот ден на театарот.

Театар Комедија/ Скопје, кој на овој ден прославува години од неговото постоење ќе не почести со претставата “ Не Сега, Драга“

Театарот “ Антон Панов “ Струмица ве повикува да ја погледнете претстава „Животинска фарма“

Во Куманово ќе се игра претставата,, Мојата ти”. Повелете вљубеници на оваа уметност, да го прославиме овој ден зедно.

Во Битола по повод светскиот ден на театарот ќе ја има на својот рпертуар ,,Но(е)ва Македонија,, политичката сатира во режија на Кокан Младеновиќ.

Teатарот “ Ацо Шопов“ Штип ќе ја игра претстава “ Бегство “

Во Охрид ќе се одигра претставата “Каде е пиштолот?” од Габор Ѓорѓеј, во режија на Дејана Николовска

СИТЕ ПРЕТСТАВИ ЌЕ БИДАТ ОДИГРАНИ / 20.ОО часот

На денешен ден точно на пладне, во Универзална сала пред 1.500 гледачи беше изведена првата претстава на тогаш штотуку родениот Театар за деца и младинци – Скопје „Чудовиштата од нашиот град“, по текст на Русомир Богдановски, а во режија на Коле Ангеловски. Осум години подоцна, тогашниот директор и основач на театарот Љубомир Чадиковски, успеа да го вдоми театарот во свој простор, каде и ден денешен се создаваат најубавите детски и младински приказни. По тој повод, а и по повод на НЕДЕЛАТА посветена на Светските чевствувања на театарот за деца и младинци и куклениот театар, ТДМ спроведе низа активности, меѓу кои и работилница за „БОН ТОН“ во театарот и бесплатна посета на претстава за децата од „СОС детското село“. Радосни, среќни и целосно посветени на театарот за деца и младинци, продолжуваме со создавањето квалитетни проекти за нашата публика. 
Театар за деца и младинци – Скопје

По повод Светскиот ден на театарот.

Селдран, кој е автор на светската порака, вели дека театарската традиција е хоризонтална и никој не може да потврди дека театарот живее во било кој центар од светот, во било кој град или привилегирана зграда. Театарот, додава Селдран, се шири низ една невидлива географија.

–  Кога сфатив дека театарот е држава сама за себе, голема територија која го покрива целиот свет, во мене се роди една решителност која исто така беше и едно остварување на слободата: ти не мораш да одиш некаде далеку, ниту пак да се поместиш оттаму каде што си, не мораш ниту да трчаш, ниту пак да се придвижиш. Публиката е онаму каде што живееш ти. Ги имаш на своја страна колегите кои што ти се потребни. Таму, надвор од куќата, ја имаш целата таа матна, непробојна дневна реалност. Потоа, ти работиш од таа очигледна неподвижност за да го формираш најголемото патување воопшто, да ја повториш Одисејата, патувањето на Аргонаутите; ти си неподвижен патник кој не прекинува да ја забрзува густината и ригидноста на својот реален свет. Твоето патување е пат кон мигот, кон моментот, кон неповторливата средба пред твоите врсници. Твоето патување е кон нив, кон нивното срце, кон нивната субјективност. Ти патуваш во нив самите, во нивните емоции, во нивните сеќавања кои те будат и те мобилизираат, истакнува Селдран во пораката.

Авторот на македонската порака оценува дека театарот се уште не е мртов, но оти од ден на ден полека умира бидејќи недостига катарзата.

–  Најдобра театарска претстава е онаа претстава што на крајот, секој од гледачите, дома, во себе, ќе си понесе сосема поинаков „петти елемент“. Што би значело дека најдобра претстава е онаа кога секој дома ќе си замине со потполно различна, само своја катарза, само свој „петти елемент“, порачува Петровски во својата порака.

.

Модератор на програмата по повод Светскиот ден на театарот – 27 март 2019: Сашо Огненовски – писател, поет, актер, режисер.

Во рамките на програмата по повод Светскиот ден на театарот 27 март 2019: Претставување на работата на Театар Чекори; 45 години активно театарско делување: „Естетика во различен контекст“ – Маја Ѓурчевска, актерка и режисерка Театар Чекори.

Гостин на програмата по повод Светскиот ден на театарот 27 март 2019 – Стефан Марковски – уредник, писател, поет – „Современост – печат на македонската книжевна и уметничка традиција“

Гости на програмата за Светскиот ден на театарот 27 март 2019: Јасмина Билаловиќ – менаџер на Медиас Артес од Охрид, актерка во НУ Театар Охрид.

Гости на програмата по повод Светскиот ден на театарот, 27 март 2019 : Дарија Андовска – композитор, професор ФМУ и ФДУ Скопје – „Функцијата композитор во театар” Македонскиот центар на ИТИ/ПРОДУКЦИЈА организира културна програма за Светскиот ден на театарот – 27 март 2019 (среда) во просториите на ЕУ Инфо Центар-Скопје.

Програма:

19ч – 19.10ч, Воведен збор/Воведно отварање (Иванка Апостолова – Раководител на Македонскиот центар на ИТИ; визуелен драматург)
19.10ч – 19.15ч, Читање на светската порака по повод 27 март со кратко претставување на авторот Carlos CELDRAN, Cuba – театарски режисер (Чита: Сашо Огненовски – актер, автор-писател, поет)
19.15ч – 19.20ч, Читање на македонската пораката по повод 27 март со кратко претставување на авторот (Чита: Југослав Петровски – автор)
19.20ч – 19.50ч, Разговор со македонскиот автор на пораката за
современиот македонски театар во однос на светските случувања (автор: Југослав Петровски, модератор: Сашо Огненовски)
19.50ч – 21.30ч, Сесија на кратки професионални претставувања на членовите и соработниците на Македонскиот центар на ИТИ:
– Претставување: „Функцијата композитор во театар” (Дарија Андовска – композитор, професор ФМУ и ФДУ Скопје)
– Претставување: „Современост – печат на македонската книжевна и уметничка традиција“ (Стефан Марковски – уредник, писател, поет)
– Претставување на Јасмина Билаловиќ – менаџер на Медиас Артес од Охрид, актерка Театар Охрид
– Претставување на работата на Театар Чекори; 45 години активно театарско делување – „Естетика во различен контекст“ (Маја Ѓурчевска – актерка и режисерка Театар Чекори)
– Сесија на прашања и одговори

Иницијатори и организатори: Македонскиот центар на ИТИ/ПРОДУКЦИЈА
Партнери: ЕУ Инфо Центар – Скопје

20. март ширум светот се прославува Светскиот ден на ТЕАТАРОТ ЗА ДЕЦА И МЛАДИНЦИ, под слоганот: „ОДНЕСИ ДЕТЕ ВО ТЕАТАР, ДЕНЕС“. 
Во чест на празникот, ја пренесуваме пораката од Ивет Харди, претседателка на меѓународната театарска асоцијација АСИТЕЖ:
———————————————————————
…На децата треба да им се укажат такви прилики во заедницата во кои ќе се потсетуваат на она што го делиме и во кои тие ќе ја ценат повеќеслојната реалност на прашањето – Што значи да се биде човек? Им требаат простори во кои ќе ги истражуваат новите
начини на мислење кои им парираат на наративите за поделби, во кои ќе чувствуваат емпатија за оние кои не се ни малку како нив. Им требаат конкретни искуства на заедништво во заедница за да ги потсетат на радоста и убавината што им ја нуди светот.
„АССИТЕЖ“ верува дека театарот отвора многу премини кон поголемо чувство за поврзаност со другите и, многу важно, со себеси. Неодамна, театарот „Њу Виктори“ во Њујорк, ги објави резултатите
од петгодишното истражување на придобивките од театарот за деца и млади. Едно од клучните, неочекувани сознанија, беше фактот дека одејќи во театар, децата добиваат надеж за иднината. Овие
резултати беа споредени со една контролна група во која тие, кои не оделе на театарски изведби и работилници во истиот тој период, го губеле чувството за нивните идни можности во смисла на образовни и работни можности. Зошто е надежта толку важна? Надежта создава позитивна енергија
што преминува во самоувереност, силна војла, издржливост и конечно, во конкретно делување за да почнеш промена во својот живот и во животот на другите. Секое дете треба да се надева.
Па ајде сите да се заложиме и да однесеме дете или млад човек во театар денес. Да ја шириме неопходната поддршка за да му се гарантира пристап до уметноста и театарот на секое дете, без разлика на неговите лични или социјални околности. И ние кои сме во оваа професија, ајде да се залагаме за овозможување
квалитетни искуства кои ќе го променат начинот на кој помладите генерации го гледаат светот – за подобра сегашност и иднина.
ИВЕТ ХАРДИ, АСИТЕЖ

 20 03 2019 

Прилепскиот  театар „Војдан Чернодрински“ утревечер од 20 часот премиерно ќе ја изведе  претставата „Демократија“ од Јосиф Бродски во режија на Кирил Петрески, која е последна од минатогодишната програма на театарот, а беше пролонгирана од објективни причини.

Се работи за македонска праизведба на единственото драмско дело на поетот, есеист и публицист Бродски, добитник на „Златниот венец“ на Струшките вечери на поезијата и на Нобеловата награда за литература од 1987 година.

Претставата е политичка сатира за прекуноќ промена на општественото уредување  на една тоталитарна држава во демократија што, според режисерот Петрески, е блиско на состојбите на овие простори.

-„Демократија“ е единствено драмско дело на Бродски напишано во 1989 година во турбулентно политичко време, распаѓањето на Советскиот Сојуз и паѓањето на Берлинскиот ѕид. Дејството се случува во една мала тоталитарна држава, која поради историските околности треба, преку ноќ, со декрет да воведе демократија. Од искуство знаеме дека транзицијата е идеално време за злоупотреба на демократијата и може одлично да послужи за задоволување на сопствените, главно, материјални интереси на политичката елита. Таа има пристап до изворите за богатење, додека великодушно од нејзината пребогата маса фрла трошки  за народот, рече Петрески.

Актерите Михајло Миленкоски и Марјан Чакмакоски истакнаа дека многу научиле во трите месеци  подготовка на претставата.

– Ја играм улогата на министер за финансии. Во претставата ја играме Владата со еден претседател и четворица министри кои треба да ја решат судбината на целата нација и на државата. Во претставата може да се види дека ние повеќе внимание посветуваме на копанот што го јадеме отколку на реформите кои треба да ги спроведеме во 30 минути. Правиме реформи во пет минути, а знамето и химната во една минута. Но не е добро. Произлегува дека политичарите не се борат за нашето добро, за доброто на граѓаните, туку  за своето добро, како да ја задржат фотелјата и да се погрижат за блиските, рече Миленкоски.

Чакмакоски додаде дека додека работеле на претставата сфатил дека демократијата била од животно значење.

-Секој ден се буидиме со демократија, демократски избори, со демократска влада. Сè било во име на демократијата. Сфатив дека демократија е сè околу нас, демократија е животот. А еден телефонски повик може да промени судбина на еден народ, на нација, на еден театар, на човечка судбина, рече  Чакмакоски.

Покрај нив, во претставата играат и Димитар Ѓорѓиевски,   Ангела Наумоска и Димитрина Мицкоска. Сценограф е Зоран Николовски, костимограф Роза Трајческа-Ристовска, автор на музиката е Марјан Неќак, а драматург Лидија Митоска-Ѓорѓиевска.

Прилепскиот театар годинава ќе работи на четири проекти, а веќе за десетина дена ќе почнат подготовките на два од нив: „Арапска ноќ“ и „Семејни приказни“.  До крајот на годинава  се планирани и премиери на  „Господа Глембаеви“ и на сатиричната комедија „Лажговци“.