Премиера на претстава: Горчлива и болна смеа со “Мизантроп“ на Охридско лето

Oваа сериозна комедија е поглед во човековата душа на современиците од периодот кога била пишувана во 17 век, но е и магнетна резонанца на нашето време Во претставата ја имаме смеата, но горчлива

Театарската претстава “Мизантроп“ од Молиер, во режија на црногорската режисерка Ана Вукотиќ, ќе се изведе премиерно утревечер (19 јули), со почеток од 21 часот, во Центарот за култура “Григор Прличев“ во Охрид, а во рамки на фестивалот “Охридско лето“.

Оваа сериозна комедија е поглед во човековата душа на современиците од периодот кога била пишувана во 17 век, но е и магнетна резонанца на нашето време. Со оваа претстава, што е во продукција на Театар Комедија од Скопје, продолжува драмската програма на фестивалот.

“Сметам дека Молиер во сите негови дела е сериозен, но прашањето е како ние ќе го поставиме, како ќе се изразиме актерски. Подготвени се сите и морам да кажам дека дадоа многу труд. Уверен сум дека публиката ќе биде многу шокирана бидејќи очекуваат лесна комедија, но не, станува збор за љубовта на човекомрзецот или омразата на човекољубецот. Каде е љубовта, каде е омразата. Впрочем, ја имаме смеата, но горчлива. Дури и така горчлива и болна смеа, нас како луѓе може да не спаси“, ќе истакне Сашо Ристовски, директор на Театар Комедија.

Улогата на Алсест во “Мизантроп“ ја игра Атанас Атанасовски, Флинт го толкува Александар Михајловски, а Орнот е Столе Мицов. Мирјана П. Ристов ја игра улогата на Селимена, Магдалена Ризова-Черних на Елијанта, а Жаклина Петровска – Милјановска во оваа претстава е Ариноја. Улогата на Акаст ја игра актерот Илија Илиоски, Клитандр е Жарко Димоски, Баск е Виктор Арсов, а Ди Боа го глуми Ердоан Максут.

Драматург на претставата е Дарко Јан Спасов, а кореографијата е на кореографката Соња Вукичевиќ. Сценограф на “Мизантроп“ е Јелена Томашевиќ, костимографијата ја направи Лина Лековиќ, а композитор на музиката е Александар Радуновиќ-Попај.

Инаку, режисерката Ана Вукотиќ е родена во 1977 година во Подгорица, а дипломирала театарска режија на Факултетот за драмски уметности во Цетиње во 2004 година, во класата на професорите Егон Савин и Радмила Војводиќ. Добитничка е на бројни награди за режија на локални и на регионални театарски фестивали.

Хуморот и сатирата се преплетуваат во барањето на среќната балканска жена!

 

Монодрамата  „Таа“ го прикажува статусот на жените во општеството.

Кој е моделот на балканската жена? Задоволна ли е од животот и дали го има зачувано чувството за хумор или напротив? Монодрамата „Таа“ ја допира севкупната слика за жената на Балканот.

“Засега „Таа“ на Балканот не е променета. Некои жени имаат подобри работни места и состојбата им се подобрува, но повеќето се принудени да бидат само домаќинќи кои готват. Нема разлика помеѓу македонската и бугарската жена. Во тој смисол и црногорките, туркините… си личат едни на други.“ – објасни актерката Оливера Аризанова, која игра во претставата.

Таа потенцираше дека балканските жени треба да се сакаат повеќе, затоа што тоа е единствениот начин за и другите да ги сакаат повеќе. Жените треба да имаат поголема улога во општеството – дополни Аризанова во „Бугарија наутро“.

„Чувството за хумор блика од ликот кој таа го создава. Посебно сум благодарна дека сум дел од фестивалот „СофијаМоно 2018“, како и на Градската Општина која го поддржува овој настан. Претставата е направена така што секоја жена од публиката да се почувствува дека е претставена на сцената.“ – истакна, авторката на текстот за претставата, Даниела Колева за Bulgaria ON AIR.

Фестивал на античка драма од 19 до 29 јули: Цезар и Нерон се враќаат во древното Стоби

”Го враќаме фестивалот каде што бил, во античкиот театар во Стоби, што значи враќање на духот на самиот антички театар за по две илјади години на исто место да се сретнат гледачите и актерите“, истакна Крстевски, директор на Велешкиот театар каде што изминатите три години поради реконструкција на амфитеатарот во античкиот Стоби, се изведуваше фестивалот. Годинава театарската магија во Стоби стартува со премиерата на “Лисистрата”

Јулие Цезар, Нерон, Кралските копилиња… годинава се враќаат во древниот амбиент на античкиот театар Стоби кој изминатите три години поради реконструкција беше затворен. Седумнаесетото издание на Интернационалниот фестивал на античка драма “Стоби“, од 19 до 29 јули, ќе биде бојното поле на кое копјата за наградите ќе се кршат околу пет претстави. Театарската магија во Стоби ќе започне и ќе заврши со претставата “Лисистрата” во изведба на Народниот театар “Јордан Хаџи Константинов-Џинот“ од Велес. Свеченото отварање е на 19 јули (21 часот).

“Годинава го враќаме фестивалот онаму каде што бил, во античкиот театар во Стоби, што значи враќање на духот на самиот антички театар за после две илјади години на исто место да се сретнат гледачите и актерите“, истакна Младен Крстевски, директор на Велешкиот театар. Инаку во изминатите три години поради реконструкција на амфитеатарот во античкиот Стоби, фестивалот се изведуваше на сцената на Велешкиот театар.

На 20 јули, на Фестивалот кој се одржува во организација на општина Велес , ќе биде изведена претставата “Јулие Цезар“ на Народниот театар од Битола, а на 22 јули на древната сцена во Стоби со претставата „Ардалион“ ќе настапи Ереванскиот Државен театар на пантомима од Ерменија. На 26 јули, пак, ќе биде изведена претставата “Кралските копилиња“ на Народниот театар од Велес, а на 28 јули претставата “Нерон и јас“ на Жамбилскиот областен руски драмски театар, Казахстан.

Според претседателот на Организацискиот одбор Драган Миладиновски, оваа година за првпат ќе се одржат и пет тркалезни маси на кои ќе се говори за претставите. Првата тркалезна маса е закажана овој петок во 12 часот во просториите на Народниот театар во Велес.

И годинава на фестивалот ќе бидат доделени наградите за најдобра машка и женска улога, за најдобра режија и Гран при наградата за најдобра претстава, како и две дополнителни награди. Крстевски најави дека идната година сите награди ќе бидат именувани, па така наградата за најдобра женска улога ќе се вика „Тинка Коларова“ во чест на првата жена актер од Велешкиот театар, наградата за најдобра машка улога “Тодорче Николовски“, а за најдобра режија “Стојан Стојановски“ во чест на овој познат македонски режисер.

Претседател на жирито кое ќе ги доделува наградите годинава ќе биде познатиот руски режисер Николај Круглов, а членови актерот Мето Јовановски, актер, и театрологот Ана Стојановска.

Организаторите годинава за фестивалот обезбедиле пет автобуси со кои публиката бесплатно ќе се носи од Велес до Стоби, а билети ќе можат да се набават и кај автобусите кои ќе поаѓаат во 20 часот, но и на касата на Велешкиот народен театар.

Паоло Маџели по 30 години со нова премиера во МНТ

  •  “Eден месец на село“

    Славниот италијански режисер Паоло Маџели, во МНТ започна да ја работи комичната претстава „Еден месец на село“, дело од врвниот книжевен опус на рускиот автор Иван Сергеевич Тургењев. За Македонскиот народен театар, оваа соработка е од исклучителна важност и еден од најзначајните проекти – не само за МНТ, но и за македонскиот театар воопшто.

    Претставата „Еден месец на село“ е втора соработка на МНТ и Маџели. Тој по 30 години повторно се враќа на голема сцена. На 10 февруари 1988 г. бешепремиерата на претставата „Црна дупка“ од авторот Горан Стефановски.

    Комично-тажната руска приказна на Тургењев Еден месец на село првпат е поставена во 1872 г. и зборува за Наталија, жена на богат земјопоседник, и младата Верочка, кои се вљубуваат во учителот на синот на Наталија. Низ драмата се провејува темата за љубовта и нејзините идеали, стремежот за среќа и возбудувања, но и прашањето на кое човекот понекогаш бара одговор – зошто човековата природа е таква што не може вљубеноста и среќата, кое тоа чувство ја носи, да ги задржи долго во себе.

    Во овој исклучителен проект ќе бидат вклучени соработници и уметници, меѓу кои  Катерина Коцевска, која го направи преводот и адаптацијата на текстот, Жељка Удовичиќ – драматург,Лоренцо Банчи – сценограф и Мануела Паладин – костимограф. Музиката ќе ја работи композиторот и автор на филмска и театарска музика Љупчо Константинов, а инспициент е Вукица Александрова.
    Улоги
    те ги играат: Ѓорѓи Јолевски, Сашка Димитровска, Дарја Ризова, Катерина Коцевска, Тина Трпкоска, Александар Микиќ, Никола Ристановски, Стефан Спасов, Нино Леви, Сашко Коцев, Дамјан Цветановски и Ана Стојановска.

    Паоло Маџели е роден во Прато, Тоскана, а веќе 30 години живее и работи во Загреб. Реализирал повеќе од 150 претстави во различни земји меѓу кои: Германија, Швајцарија, Италија, Израел, Унгарија, Венецуела, Мексико, Колумбија, Хрватска, Белгија, Словенија, Србија и Црна Гора. Од 80-тите години неговите бројни режии оставаат длабок печат на балканските простори, а неговото влијание е присутно и на европската и латиноамериканска сцена. Во Прато бил асистент на Џорџо Стрелери заедно со Роберто Бенињи, Памела Вилорези, Саверио Маркони, Франческо Нути и Марчело Бартоли го основаат „Teatro studio de Teatro Metastasio“, каде што ја започнува својата кариера.

    Во средината на 70-тите години почнува да работи на сцените во поранешните ју-простори (Белград, Сараево, Загреб, Љубљана, Сплит, Скопје и Дубровник), каде што се прославува и добива бројни награди за своите режии. Соучествува на меѓународниот театарски фестивал БИТЕФ со тогашната уметничка авангарда, меѓу кои: Роберт Вилсон, Лучано Пинтилие, Петер Задек и Бен Бесон.

    Срдечно,
    НУ МАКЕДОНСКИ НАРОДЕН ТЕАТАР

Марта Дојчиновска костимограф

 

Во прво лице

ЖИВОТОТ Е ИСТРАЖУВАЊЕ, ПРЕДИЗВИК, УЖИВАЊЕ…

1. ЗА СЕБЕ : Сонувач

2 . ЗА ЉУБОВТА:  Енергија, инспирација, магија, слобода

3. ЗА ЖИВОТОТ:  Истражување, предизвик и уживање…

4. ЗА ТЕАТАРОТ:  Паралелна димензија на постоењето

5. ЗА ДОБРОТО:   Прегратка која треба да се шири

6. ЗА ЗЛОТО: Кога би можело да го снема…

7. ЗА НЕПРИЈАТЕЛИТЕ  Нема такви околу мене

– А, ПРИЈАТЕЛИТЕ? Радост ми се <3

8. ЗА ГЛУМАТА ВО ЖИВОТОТ: Беспотребна

9. ЗА СЦЕНСКАТА ПРАШИНА: Не е здрава 🙂 aма создава атмосфера во која што задоволство е да се твори

10. ЗА КОЛЕГИТЕ: Поддршка, поттик, партнерство, пријателство

11. ЗА НЕСКРОЕНИТЕ КОСТИМИ: Мечтаење. Сè што треба ќе си дојде.

12 . ЗА ИДЕЈАТА: Двигател. Ветер во грб

13. ЗА СОНОТ: Без него ништо. Дел од инспирациите ги наоѓам таму

14. ЗА ЈАВЕТО: Боја, простор, звук и светлина

15. ЗА ВИНОТО: Прeубо!

16. ЗА СЕМЕЈСТВОТО: Мое сè! Најверни другари, топлина на душата

17. ЗА КРАЈ: Oчите ширум отворени и фокус кон убави нешта

ФАД се враќа дома во Стоби, а ќе се шетаме со помош на мобилна апликација

Низ археолошкиот локалитет Стоби во иднина ќе може да се движиме и со помош на мобилна апликација, која ќе ни помогне да се запознаеме со историјата на објектите при нашата обиколка. Првиот аудиоводич за археолошки локалитет во Република Македонија е изработен од националната установа за управување со археолошкиот локалитет Стоби, во соработка со софтверската компанија “G6 Solutions” од Скопје и тој е веќе во употреба, а достапен е на мобилната апликација Stobi audio guide.

“Аудиоводичот ќе му помогне на секој посетител да го запознае и доживее археолошкиот локалитет Стоби, еден од најубавите локалитети во Македонија, на интерактивен и автентичен начин. Стоби е една од најпосетуваните туристички дестинации во Македонија и, за потребите на посетителите, покрај туристички водич за посетителите на локалитетот, отсега ќе може да се користи и мобилната апликација Stobi audio guide, која е достапна за Андроид и ИОС оперативни системи, на македонски и на англиски јазик”, вели Митко Тутковски, в.д. директор на НУ Стоби.

Апликацијата ги содржи сите неопходни информации за објектите кои се во состав на археолошкиот локалитет, како и кус историјат за локалитетот и насоки за движење согласно неговиот историски наратив. Посетителите ќе може да ја спуштат апликацијата на самиот влез на локалитетот каде што е обезбеден и слободен интернет пристап.

Автори на текстовите за водичот се дел од вработените во НУ Стоби: Димитар Николовски, Мишко Тутковски, Гоце Павловски и Силвана Блажевска. Наратор на македонски јазик е Славица Бабамова, а автор на преводот и наратор на англиски јазик е Димитар Николовски.

ДАРИЈАН ПЕТРОВ: „НАЈДОБАР МЛАД АКТЕР“ на фестивалот „АКТЕРОТ НА ЕВРОПА“

 

Актерот ДАРИЈАН ПЕТРОВ ја доби наградата „НАЈДОБАР МЛАД АКТЕР“ на фестивалот „АКТЕРОТ НА ЕВРОПА“ за улогота Дони, од претставата „ДОНИ ДАРК“, во режија на Роберт Ристов, продукција -ТЕАТАР КОМЕДИЈА!!!
ЧЕСТИТКИ ДАРИЈАН!!!
НЕКА НИ СЕ МНОЖАТ!!!

ЧЕСТИТКИ!!!!!!!!!!!!!!!!!

Пантомимичарот Трајче Ѓорѓиев во пресрет на 11. “Панфиз”: Убаво е кога публиката може да те разбере на секој континент!

Годинава се одржува 11. издание на “Панфиз”, интернационален фестивал на пантомима и физички театар. Како идеен творец на “Панфиз”, со што овој пат ќе ја привлечете публиката и во што ќе бидете поразлични од минатите години?

Оваа година, публиката ќе има можност да види претстави од четири жанра: детскиот, ритуалниот, класична пантомима и буто перформанс. Се надеваме дека ова ќе биде доволна причина публиката да ужива во фестивалските денови посветени на пантомимата и физичкиот театар.

Со оглед дека секоја година финансиите за организирање на фестивали се реален проблем, дали постои интерес од спонзори да финансираат вакви претстави и како се снаоѓате?

Искрено не сум ни пробал да одам и да барам финансии по фирми и претпријатија… некако не се чувствувам добро ни кога помислувам на тоа, а уште помалку пак да се јавувам и да барам средби со некакви бизнисмени кои можеби никогаш и не влегле во театар. Нашиот фестивал има покровител на наградата, кој сам се јави да помогне и тоа од Париз, каде што живее. Тој е по потекло од Ботевград, Бугарија, и е голем љубител на пантомимата. Можеби средствата не се големи но сепак нам тоа ни е од огромно значење и непроценлива поддршка.Финансиите од Министерството за Култура и Град Скопје секако дека не се доволни, но засега се единствен извор за опстојувањето на фестивалот. Се надеваме дека во иднина оваа поддршка ќе се зголеми и ќе можеме да размислуваме за пошироко издание на фестивалот во секоја смисла.

Со оглед дека и покрај досегашните 10 изданија и учество на театри и пантомимичари од цел свет, сепак овој вид на театар во Македонија како да е недоволно афирирмиран. Дали според вас постои надеж ова да се смени и пантомимата и физичкиот театар во земјава да добијат заслужено место?

Тоа е долг процес и мислам дека ќе потрае уште. Се почнува или би требало да започне од образовните институции кои воспитуваат и едуцираат актери т.е. Факултетите за драмски уметности. За жал, ете ,кај нас не постои тој предмет и не се изучува. Пред десет години се пројави интерес, но се остана на тоа. Фестивалот ја врши својата мисија, но само тој и во ваква форма (скратен) не е доволен. Пак ќе кажам, се надеваме дека доаѓаат подобри услови и времиња.

Има ли меѓу младите актери во Македонија интерес за пантомима и физички театар и дали има публика што го следи овој жанр?

Има, но некако како да се исплашени малку од жанрот, но јас мислам дека некој им пренел погрешни нешта додека студирале. Зошто е тоа така, не знам и не успевам да дознаам. Пред неколку дена, предложив проект пантомима за деца и млади во една наша афирмирана театарска институција, но добив порака дека дел од актерите не се согласиле со таков проект. Што да ви кажам? Со сила не можеш никому да дадеш. Здравје. Што се однесува до публиката, таа од фестивал е се побројна и еве веќе од самата публика има многу луѓе што се пријавија на буто работилницата која ќе се оддржи во тек на фестивалот.

Ова е еден од ретките фестивали на пантомима во регионот, колку се заинтересирани странските пантомимичари и театри да настапат на фестивалот во Скопје?

Фестивалот е можеби единствен на Балканот, па и пошироко. Интересот е огромен… Јас безмалку секој ден добивам по една до две апликации… некои продукции се воглавно уличен театар, циркус и слично, но многу од нив се издржани театарски претстави од светски ранг за кои се потребни многу средства кои ние во овој момент ги немаме. Со подобрен буџет, тврдам дека публиката кај нас би можела да види нешто несекојдневно, атрактивно и фантастично. Можеби, в година.

Според Вас, која е тежината, а која убавината на пантомимата и физичкиот театар?

Па, по мое мислење не постои тежина кога работиш нешто кое те исполнува, а убавината е во невербалната комуникација со публиката која може да те разбере на секој континент, еден универзален јазик на постоењето, уметноста и љубовта помеѓу луѓето. (Д.Т.)

Годинава гости од Грција, Бугарија, Србија и Финска

Интернационалниот фестивал на пантомима и физички театар “Панфиз 2018“ ќе се одржува во два дела од 7 до 9 јули и на 30 септември на малата сцена на Македонскиот народен театар. Фестивалот ќе почне на 7 јули во 20 часот со претставата “Снешкото што не сакаше да се истопи“ на Визуелен куклен театар “Празеин Алога“ од Грција и настап на Емануела Капокаки. На 8 јули ќе има две претстави на уметници од Бугарија – гостуваат “Симург” со Александар Илиев (20 часот) и “Кругот на животот” на Филип Дончев (21:30 часот), а на 9 јули -“Мандрагора“ на Марко Нектан од Србија. На 7 и 8 јули ќе биде одржана и буто-работилница под водство на буто-артистот Марко Нектан од Србија. Вториот дел на “Панфиз” ќе се одржи на 30 септември, кога е најавено гостување на финската атракција „Мимо Арт“ од Хелсинки со претставата „Body Notes“.
Влезот за претставите е бесплатен.

vecer.press / дневен весник ВЕЧЕР

Почнува 11.„Панфиз”, четири претстави до понеделник

На малата сцена на Македонскиот народен театар од денеска до 9 јули ќе се одржува првиот дел од 11. Интернационален фестивал на пантомима и физички театар „Панфиз 2018“.

Ќе бидат изведени четири претстави од три соседни земји (Грција, Бугарија и Србија), сите жанровски различни, така што публиката ќе може да види куклен, ритуален, класична пантомима и буто.

Фестивалот ќе почне вечер во 20 часот со претставата „Снешкото што не сакаше да се стопи“ на Визуелен куклен театар „Празеин Алога“ од Грција и настап на Емануела Капокаки.

Утре ќе има две претстави на уметници од Бугарија – гостуваат „Симург“ со Александар Илиев (20 часот) и  „Кругот на животот“ на Филип Дончев (21.30 часот), а во понеделник е претставата „Мандрагора“ на Марко Нектан од Србија.

Под водство на буто-артистот Нектан, денеска и утре во рамки на фестивалот ќе биде одржана работилница за буто, кој е театар на движењето со потекло од Јапонија и е мешавина од германската експресионистичка школа за игра, Но театар и јапонската зен-традиција.

Според уметничкиот директор Трајче Ѓорѓиев, „Панфиз“ се обидува оваа година да претстави неколку различни жанрови од областа на пантомимата и физичкиот театар. Во основата на сите нив е движењето, а пристапот се базира на драматургијата и карактерите.

Вториот дел на „Панфиз“ ќе се одржи на 30 септември, кога ќе гостува финската атракција „Мимо Арт“ од Хелсинки со претставата „Боди Ноутс“ (Body Notes). „Мимо Арт“ е новоформирана театарска трупа која на „Панфиз“ во септември ќе прикаже една од своите најнови продукции. Се работи за артикулирана сценска физичка игра, која во исто време кокетира со танцот како ад хок израз.

Влезот за претставите на 11. „Панфиз“ од денеска до 9 јули е бесплатен за посетителите, со претходна резервација во МНТ.

„Охридско лето“ годинава во знакот на различната жанровска театарска естетика на режисерите и продукциите

 

„Охридско лето“ во текот на изминатите педесет и седум години се потврди како реномиран европски фестивал каде се испишани најдобрите и најславните светски уметници. Успешната приказна продолжува и годинава, каде заедно со врвните имиња во светот на музиката, ќе учествуваат и исклучително добри театри со квалитетни драмски проекти.

На фестивалските сцени од 12-ти јули до 20-ти август ќе плени уметноста на бројните музички, драмски, балетски претстави, изложби, како и настани за најмладите. Новините што ќе ги воведеме од ова фестивалскоиздание ќе го продолжат патот на успешната традиција, но и ќе воведат модерна димензија што ќе ја надополни фестивалската историја,  вели директорката на „Охридско лето“, Сузана Вренцовска.

Драмската програма започнува со претствата „Стаклена Менажерија“

Драмската програма на 58-то издание  на „Охридско лето“ќе биде во знакот на различната жанровска естетика на режисерите и продукциите и ќе понуди проекти за сечиј вкус. Драмскиот дел ќе започне, еден ден по свеченото отворање на фестивалот, на 13-ти јули, со театарската претстава „Стаклена Менажерија“ од Тенеси Вилијамс, во продукција на Народниот театар од Охрид. Режисер на овој проект е Софија Ристевска Петрушева која на македонската театарска јавност веќе неколку години и е позната по својот алтернативен режисерски ракопис, во кој нема многу простор за “влакна на јазикот”, како и по својата жестокост во одредени претстави – проекти, кои секогаш оставаат впечаток кај гледачот.

-„Стаклена менажерија“ е претстава за комплексите, несигурноста и суровоста на современиот човек, кој сосема ја загубил солидарноста и сочувството кон послабиот. Во ова време на либерален капитализам, хуманоста полека исчезнува. „Стаклена менажерија“ е емоционално патување низ комплексноста на семејните односи. Претставата е болен крик за големата неспособност на човекот да љуби, вели Ристевска.

“Стаклена Менажерија” е едно од најинтересните дела на славниот Тенеси Вилијамс. Тој ја отсликува својата автобиографија во односите помеѓу самите ликови во драмата. Доминантната мајка ги измачува своите деца со нејзините константни планови за иднината.

Театар Комедија Скопје носи премиера на „Охридско лето“

Театарската претстава „Мизантроп“ од Молиер, а во режија на Ана Вукотиќ, актерите од Театар Комедија-Скопје ќе ја изведат премиерно на „Охридско лето, на 19. јули. Оваа сериозна комедија  е поглед во човековата душа на современиците од периодот кога била пишувана во 17 век, но e и магнетна резонанца на нашето време.

Патувањето со нас е како гледање во играта на сенката. Ако се вели дека првата линија била линијата на сенката, нашиот мизантроп подвлекува линија и го поставува онтолошкото прашање: кој е побезбедниот пат – дали умерената лага или ноторната вистина? Во кој од овие два избора демне спасот, и постои ли воопшто вистинска вистина? Дали еуфемизмите на современиот ултра хипер орто и онто човек ќе ја сменат линијата на неговата сенка ако наместо слатки лаги почне да (рас)кажува за нештата какви што се навистина. Но внимателно со иднината, сенката на современиот човек кој пат и да го фати, бездруго, ќе допре до портите на пеколот. Ова е и драматуршка потрага по тоа кој е човекомразецот во пиесата – Алсест или Оронт, или можеби Селимена, Арсиноја…?

Алсест и Филинт, Арсиноја и Селимена, и сите ликови во оваа трагикомедија се драматуршки биполарни, расцепени помеѓу стравот и страста, разумот и срцето. Понекогаш овие борби и ова биполарно растројство знаат да бидат смешни, забавни. А можеби во тоа се состои и лекот и спасот. Смеата! Макар и горчлива, таа ќе нè спаси.

„Смртта на Дантон“ го отвора прашањето –дали денес е воопшто можна револуција

И покрај револуционерните идеи, авторот на драмата „Смртта на Дантон“, Георг  Бихнер  покажува и сомнеж за начинот на спроведување на револуционерните промени. Го поставува прашањето: кога престанува револуцијата? Токму поради тоа дејството во драмата се фокусира на периодот на владеењето и раздорот на самите револуционери.

Суштината лежи во судирот меѓу Дантон и Робеспјер односно меѓу две различни сфаќања за тоа каква би требало да биде државата по спроведената револуција. Дантон од самиот почеток е прикажан како декадентен човек, склон на хедонизам, но неговите политички ставови се либерални и толерантни. Робеспјер пак, се колне во доблеста, за себе тврди дека има чиста совест, но ги убива сите кои размислуваат поинаку од него бидејќи, доблеста мора да владее со помош на терор.

Според драматургот на претставата, Жељка Удовичиќ – Плештина, поради тој егзистенцијален фатализам, поради таквото спознание на еден млад -20 годишен човек,  оваа драма е толку нова и единствена. Покрај тоа, „Смртта на Дантон“, поради користењето на богатиот документарен материјал и монтажата на цитатите и историските извори со авторската интерпретација на темата, во времето кога е напишана предизвикала многу контроверзии и ја чекала праизведбата повеќе од 60 години. Денес ова дело се смета за предвесник на т.н. документарен театар.

-Токму тој факт ни даде можност, но и обврска, со оваа претстава да проговориме за нашата современост. Економската криза нѐ  слабее, социјалните неправди се модус за животот на мнозинството – неолибералниот капитализам безмилосно ги гази нашите егзистенции не оставајќи ни излез, теророт на медиумите ги става на гилотина неподобните, но на хоризонтот не се гледа радикална општествена промена. Го поставуваме прашањето: дали денес револуција е воопшто можна, вели Удовичиќ – Плештина.

Театарската претстава „Смртта на Дантон“ според текст од Георг Бихнер, а во режија на Дино Мустафиќ, на 22-ри јули ќе ја одиграат актерите од Албанскиот театар –Скопје.

„Охридско лето“ ги отвора сцените и за најмладата публика

Единствениот национален театар специјализиран за програмата за деца и млади во Македонија, Театарот за деца и младинци на 26-ти јули на  „Охридско лето“ ќе ја донесе куклената претстава „Тоби“ според текст на Флоријан Зденек, во режија на Драгослав Тодоровиќ.

-Отворајќи ја сцената токму за најмладите кои како дел од општеството ја градат иднината на државата,ќе ја всадиме уметноста во длабочината на детската душа, како и почитта  кон високите уметнички стандарди, вели директорката на фестивалот, Вренцовска.

За режисерот Тодоровиќ, ова е трета соработка со ансамблот на Театарот за деца и младинци.

-Постои нешто, особено кај младите, што изгледа како ненадминлива препрека. Во тие години никако не сте задоволни од сопствениот изглед. Меѓутоа ако имате пријателка како госпоѓата Флора, вие, како јазовичарот Тоби ќе се согледате од сосема друг среќен агол со помош на пријателите. И уште нешто: „Никогаш немојте да се китите со туѓите перја. Ќе испаднете смешни“, вели режисерот Тодоровиќ.

„Странци“ – претстава за улогата на технологијата во одредувањето на вистината

Драмски театар –Скопје ќе ја збогати драмската програма на 58-то „Охридско лето“ со театарската претстава „Странци“ од Филипо Болоња, во режија на Нела  Витошевиќ што ќе биде изведена на 29-ти јули.  Станува збор за драма во која седумина пријатели играат игра при што ги споделуваат сите телефонски пораки, разговори, фотографии, комуникациите преку социјалните мрежи и на тој начин ги откриваат личните тајни, отвoрaјќи болни конфликтни ситуации. Истовремено се  потенцираат разликите помеѓу приватното и јавното себе претставување.

„Девојчето со жиците“ – современа драмска опера за виолинистка која сонува слава

„Девојчето со жиците“ е современа драмска опера за виолинистка кој патува со воз низ Европа. Преку нејзиното патување, се исцртува приказната за нејзиниот живот.  На почеток, таа е девојка која сонува и сака да стане славен музичар, но татко ѝ ги потрошил парите за нејзиното школување. Подоцна, таа е зрела жена која сè уште трага по нејзиното место под европското небо, откако целиот свој живот го минува како улична музичарка. Сѐ е на купче. Ја натежнала тешката економска ситуација, комплицираниот однос со пропаднатиот татко, потрагата по место во современа Европа, која сѐ повеќе е социјално исклучувачка, „испредена“ со бодликави жици, ѕидови и секакви ограничувања.  Приказната е универзална и е потсетник на позицијата на бројните надарени поединци, кои и моментално бараат засолниште во кое ќе можат да ги развијат своите потенцијали. „Девојчето со жиците “ е копродукциски проект на СНГ Драма од Љубљана и Moving Music Theatre од Битола. На „Охридско лето“ ќе биде изведена на 7-ми август.

„ Во агонија“ – приказна за искачувањата и падовите во општеството

Познатата драма од Крлежа, дел од трилогијата Глембаеви, е поставена како жесток судир помеѓу тројца луѓе. Во средиштето на приказната за љубовниот триаголник и искачувањата и падовите во општеството, се наоѓа чувствителната и разочарана Лаура Ленбахова. Таа храбро ја издржува имотната и општетвената деградација работејќи во својот кројачки салон и служејќи ги нејзините клиенти, нејзиниот интимен пријател, адвокатот Иван кој успева да се снајде во новонастанатите општествени ситуации и сопругот, баронот Ленбах, поранешен коњанички потполковник и поранешен затвореник. „Во Агонија“ ќе се одигра на 14-ти август во Предворјето на црквата „Света Софија“.

Со „Илијада“ ќе згасне фестивалскиот оган

Честа свечено да го затвори 58-то издание на „Охридско лето“, на 20-ти август,  ја имаат актерите од Словенечкиот Народен театар –СНГ Драма Љубљана, Цанкариев Дом и Градски театар со копродукцискиот проек „Илијада“ од Хомер, во режија на Јернеј Лоренци. Претставата „Илијaда“ е иновативна и величествена. Колку што е класична, толку е и инспирирана од европската театарска авангарда, со суптилни совети на модерната историја на Балканот. Изведбата започнува како концертна верзија на една опера, актерите во формална облека, седат на столици, раскажувајќи ја крвавата историја за „Илијада“ на микрофони. Микрофоните не се само за да се збогати звукот на зборовите, туку целата изведба е изградена од музика и поетскиот ритам хексаметар, слично како отчукувањата на срцето и одекот на коњскиот кас. Раскажаниот вовед полека прераснува во едно целосно театарско доживување со универзална релевантна нишка, кое е препознатливо за целата публика.