| Ренесансната личност на Благоја Иванов – ерудит од исклучителен формат, писател со редок (“чеховски”) сензибилитет, космополит по убедување и, како што самиот милува да вели, даскал по вокација – не само што ја збогати македонската театарска критика (со која тој активно се занимавал повеќе од две децении, од 1956 до средина на седумдесеттите години), туку битно придонесе и за втемелувањето и иницијалниот развој на македонската театролошка наука. |
Имено, Благоја Иванов ќе биде еден од одвај неколкумината квалификувани, систематски едуциранимакедонски театролози коишто првите сериозни постигнувања од оваа областа ќе умеат не само да ги реализираат (со сопствени сили!), туку и мериторно да ги промовираат/афирмираат и надвор од (сепак!) тесните македонски рамки. Нему му припаѓа заслугата што просто не може да се одмине, не само во оваа свечена прилика: имено, како автор на мошне важната книга “Савремена драма и позориште у Македонији”, објавена во издание на Стериино позорје во Нови Сад (1982), тој го овозможи првото компетентно претставување на македонскиот театар надвор од границите на државата. Успешноста на тоа претставување беше и останува голема имено затоа што е втемелена врз високите научни принципи: прецизност, внимателност, методичност, скептичност, едноставност.И како професор, Благоја Иванов ги почитуваше и применуваше истите тие принципи. Генерации студенти него го паметат како строг, правичен, но (затоа) и исклучително сакан даскал-муабетчија, учител чиишто сериозни, директни, театролошки длабоко втемелени анализи на дузини актерски, режисерски и драматуршки феномени ги усвојувале со доверба и почит.
Прозаист со мошне респективен опус, маркиран и со неколку најугледни награди (Рациновото признание, “Кочо Рацин”…), во текот на своето полувековно пишување Благоја Иванов се потврдил и како суптилен драматичар, одговорен критичар, луциден есеист.
Доделувајќи му ја оваа висока награда, театарскиот еснаф ја искажува својата искрена благодарност кон театрологот Благоја Иванов, еден од своите најдоследни и најпочитувани поддржувачи.